பொன். சிவகுமாரன் போராட்டமும் ஜுன் 05 நினைவு நாளும்

பொன். சிவகுமாரன் போராட்டங்கள்
ஜுன் 05 நினைவு நாள்
விடுதலைப் போரட்டத்தில் 1974ஆம் ஆண்டு சயனைட் அருந்தி உயிர்நீத்த தியாகி பொன் சிவகுமாரின் 44வது நினைவு நாள் (யூன் 5) இன்றாகும். இந் நாள் ஈழத்தமிழர்கள் வாழும் இடங்களில் எல்லாம் இன்று கடைப்பிடிக்கப்படுகிறது.
“எதனை விரும்புகிறோமோ அது தோன்றுகிறது. எதை ஆதரிக்கிறோமோ அது வளர்ச்சி பெறுகிறது. பேணாத பண்டம் அழிந்து போகும். பழக்கத்தால் இல்லாத திறமை இழந்து விடப்படும். அறிவுடையோரையும் லோகோபகாரியையும் (மனித நேயர்) வீரரையும் கொண்டாடாத தேசத்தில் அறிவும், லோகோபகாரமும் வீரமும் மங்கிப போகும்” என்கிறார் மகாகவி பாரதியார்.

தமிழீழ விடுதலைப் போரில் பல்லாயிரக்கணக்கான வீரர்களும், வீராங்கனைகளும் தங்கள் இனிய, இளைய உயிர்களை அர்ப்பணித்துள்ளார்கள். அந்த விடுதலைப் போராட்டத்தில் முதல் தற்கொடையாளன் தியாகி பொன் சிவகுமாரன் ஆவார்.விடுதலைப் போரட்ட வரலாற்றில் சயனைட் விழுங்கி உயிர் நீத்த முதல் போராளியும் அவனே.
அடக்குமுறைக்குள்ளான மக்களின் விடுதலைக்கு அம்மக்கள் மத்தியில் விழிப்புணர்வை ஏற்படுத்தி, அடக்குமுறைக்கெதிராகக் கிளர்ந்தெழுகின்ற போர்க்குணத்தை மக்கள் மனங்களில்; விதைத்தவன் சிவகுமாரன். அந்த ஆற்றல் அவனது மாணவப் பராயம் தொடக்கம் அவனிடம் இருந்தது.

சிங்கள – பௌத்த பேரினவாதம் தமிழ் மக்கள் மீது அடக்குமுறைகளையும், படுகொலைகளையும் கட்டவிழ்த்து விட்ட போது தமிழ் மக்களின் இருப்பு கேள்விக்குறியானது. அவர்களது வாழ்க்கை குருவிக்கூடு கலைக்கப்பட்டது போல் சிதைக்கப்பட்டது. அடக்குமுறைக்கு எதிரான அஹிம்சை போராட்டங்கள் வலுவிழந்து போயின. எதிரியின் இராணுவ அடக்குமுறை மேலும் மேலும் வலுத்தது. இம் என்றால் சிறைவாசம் ஏன் என்றால் வனவாசம் என்ற கொடுங்கோல் ஆட்சி நடந்து கொண்டிருந்தது
இந்தப் பின்னணியில்தான் அன்று மாணவனாகவிருந்த சிவகுமாரன், தமிழ் மக்களின்; உரிமைகள் மீட்கப்படுவதற்கும், சுதந்திரமான வாழ்வை உறுதி செய்வதற்கும் ஆயுதப் போராட்டமே சரியான வழி என உணர்ந்தான். சிங்கள – பௌத்த பேரினவாதத்திற்கு எதிராக ஆயுதம் ஏந்திய போரட்டத்திற்கு பிள்ளையார் சுழி போட்டான்.

சிவகுமாரன் ஆயுதப் போராட்டத்திற்கு போட்ட பிள்ளையார் சுழியே பிற்காலத்தில் ஆலமரம் போல் வளர்ச்சி பெற்று ஒரு மரபு வழிப் போராக பரிமாணம் பெற்றது.
யாழ்ப்பாணம், உரும்பிராயில் பிறந்த சிவகுமாரன் சிறு பராயத்தில் இருந்தே அநீதிகளைக் கண்டு கொதித்தெழுகின்ற, அவற்றைத் தட்டிக் கேட்கின்ற இயல்புடையவராக விளங்கினான். தமிழ் மக்கள் மீதான சிங்கள ஆட்சியாளர்களின் அடக்கு முறைக்கும் ஒடுக்குமுறைக்கும் எதிராக போராட வேண்டுமென்ற துடிப்புடன் சிவகுமாரினால் மேற்கொள்ளப்பட்ட போராட்டம் சரியான அரசியல் அடித்தளத்தை கொண்டதாக இருந்தது. தொலைநோக்கு அடிப்படையில் அமைந்திருந்தது.

1970ம் ஆண்டு தேர்தலில் சிறிமாவோ பண்டாரநாயக்காவின் தலைமையில் வெற்றி பெற்ற ஐக்கிய முன்னணி கட்சி ஆட்சியை பிடித்தது. சிறிலங்கா சுதந்திரக் கட்சியைத் தலைமையாகக் கொண்ட ஐக்கிய முன்னணியின் இலங்கை கம்யூனிஸ்ட் கட்சியும் லங்கா சமசமாயக் கட்சியும் இணைந்திருந்தன. ஐக்கிய முன்னணி அரசில் கல்வி அமைச்சராக பதவியேற்ற பதியுதீன் முகம்மது அவர்கள் பல்கலைக்கழக நுழைவுத் தேர்வுக்கு புள்ளிகள் அடிப்படையிலான தரப்படுத்தல் திட்டத்தை அறிமுகப்படுத்தினார். பல்கலைக்கழக நுழைவுக்குத் தமிழ் மாணவர்கள் தரப்படுத்தல் செய்யப்பட்டார்கள். தேர்வின் சிங்கள மாணவர்களை விட தமிழ் மாணவர்கள் அதிக மதிப்பெண் பெற்றிருந்தாலும் அவர்களுக்கு பல்கலைக்கழகங்களின் கதவுகள் சாத்தப்பட்டன. ஒரு இனத்தை அழிக்கவேண்டும் என்றால் அந்த இனத்தின் கல்வியை அழித்தல் போதுமானது. காரணம் கல்விதான் ஒரு இனத்தின் பலமாகும். இது சிங்கள ஆட்சியாளர்களுக்கு தெரிந்திருந்தது.

1970 ஆம் ஆண்டு நவம்பர் மாதத்தில் தரப்படுத்தலுக்கு எதிரான கண்டன ஊர்வலத்தை மாணவர் பேரவை யாழ்ப்பாணத்தில் நடாத்தியது. பின்னர் திருகோணமலை, மட்டக்களப்பு நகரங்களிலும் நடாத்தப்பட்டது. இந்த நடவடிக்கைகளில் பங்கேற்ற சிவகுமாரன் சாத்வீக நடவடிக்கைகளில் திருப்தியுறாமல் வன்முறை நடவடிக்கைகளில் ஈடுபாடு காட்டத் தொடங்கினார்.
கல்வித் தரப்படுத்தலை அமுல்படுத்திய சிறிமா பண்டாரநாயக்காவின் அரசில் துணை அமைச்சராகவிருந்த சோமவீர சந்திரசிறி பயணம் செய்த வாகனத்திற்கு நேரக்கணிய வெடி வைப்பதோடு தொடங்கியது சிவகுமாரனது ஆயுதப் போராட்ட வரலாறு இச்சம்பவத்திலிருந்து சிங்கள அமைச்சர் உயிர் தப்பிய போதும் அச் சம்பவம் தொடர்பான குற்றச்சாட்டில் கைதான சிவகுமாரன் சிறையில் மோசமான சித்திரவதைகளுக்கு உட்படுத்தப்பட்டான்.
யாழ்ப்பாண பிரதான வீதியில் ஒரு உணவகத்திற்கு முன்னே தரித்து நின்ற யாழ்ப்பாண மேயர் துரையப்பாவின் காருக்கு குண்டு வைத்தது, அமைச்சர் சோமவீர சந்திரசிறியின் காருக்கு உரும்பிராயில் வைத்து குண்டெறிந்தது போன்ற சம்பவங்கள் காரணமான சிவகுமாரனது பெயர் பத்திரிகைகளில் அடிபடத் தொடங்கியது.தரப்படுத்தல், ஒடுக்கு முறை போன்ற அநீதிகளுக்கு எதிராக போராடும் நோக்கோடு உயர் கல்வி மாணவர்கள் ஒருங்கிணைந்து தமிழ் மாணவர் பேரவையை உருவாக்கினார்கள். 1968லும், 1971லும் தமிழ் மாணவர் பேரவையில், ஈழத் தமிழ் இளைஞர் பேரவையில் மாவை சேனாதிராசா,சத்தியசீலன், அரியரத்தினம் முதலானோருடன் இணைந்த சிவகுமாரன் சிங்கள – பௌத்த பேரினவாத அரசுக்கும் தமிழ் தேச விரோத சக்திகளுக்கும் எதிரான போரட்டத்தில் ஈடுபட்டான். 1974 தை 10ல் தமிழாராட்சி மாநாட்டை குழப்பும் நோக்கத்தில் பொலிசாரின் துப்பாக்கிச் சூட்டில் 10 தமிழர்கள் கொல்லப்பட்டனர். அதிலிருந்து தான் சிவகுமாரன் வன்முறைப் போரட்டாத்தில் ஈடுபட்டான். 1973ல் மல்லாகத்தில் நடைபெற்ற தமிழரசுக் கட்சியின் 12ஆவது மாநாட்டிலும் கலந்து கொண்டான்.

1956 ஜுன் 5ம்திகதி அன்றைய பிரதமர் பண்டாராநாயக்கவினால் அரச உத்தியோக மொழி தனிச் சிங்களமே என பாராளுமன்றத்தில் பிரேரணை முன்வைக்கப்பட்டது. அப் பிரேரணை மீது உரையாற்றிய கொல்வின் ஆர்.டி.சில்வா “ஒரு மொழியென்றால் இரு நாடு; இருமொழியென்றால் ஒரு நாடு” என்று தீர்க்கதரிசனமாய் உரையாற்றினார்.
1956 ஆனி 05ல் பாராளுமன்ற முன்றலில் தமிழரசுக் கட்சியின் தலைவர் தந்தை செல்வா தலைமையில் அத் தனிச் சிங்கள சட்டத்தை எதிர்த்து சத்தியாக்கிரகப் போராட்டம் நடைபெற்றது.அப்பொழுது சிங்கள தீவிரவாதிகள் காடைத்தனமாக சத்தியாக்கிரகிகளை மூக்கில் தடிகளையும், கருங்கற்களையும் கொண்டு தாக்கினார்கள். அதனால் அமிர்தலிங்கம் அவர்கள் தலை பிளந்தது. இரத்தம் பாய்ந்தது. சிந்திய இரத்தத்தோடு பாரளுமன்றம் சென்று உரையாற்றினார். வன்னியசிங்கம், நாகநாதன் முதலானோர் மோசமாக தாக்கப்பட்டு ஆடைகள் கிழிக்கப்பட்டு, தொண்டர்கள் இரத்தம் சிந்தும் அளவுக்கு போர் நடந்தது. காலிமுகத்திடலில் முதல்; இரத்தம் சிந்தப்பட்டதும் 1956 ஜுன் 05 தான்.

1972 மே 22ல் ஐக்கிய முன்னணி அரசில் இணைந்திருந்த லங்கா சமசமாயக் கட்சியின் மூத்த தலைவர்களில் ஒருவரான கொல்வின் ஆர்.டி.சில்வாவினால் வரையப்பட்ட புதிய அரசியல் யாப்பு நிறைவேற்றப்பட்டது. இந்த யாப்பு இலங்கைத் தீவின் பெயரை சிறிலங்கா என மாற்றம் செய்தது. சிங்கள மொழி மட்டும் சட்டம் யாப்பின் சேர்க்கப்பட்டது. சிறுபான்மை இனங்களின் உரிமைகளை உறுதி செய்வதற்காக சோல்பரி அரசியல் யாப்பில் இருந்த விதி 29 முற்றாக நீக்கப்பட்டது. இவற்றோடு நின்றுவிடாமல் பெரும்பான்மை சிங்கள மக்களின் மதமான பௌத்த மதத்திற்கு முன்னுரிமை வழங்கப்படும் என புதிய யாப்பு பிரகடனம் செய்யப்பட்டது. 1972 அரசியலமைப்பை எதிர்த்து நடத்திய போராட்டங்களில் காசிஆனந்தன், மாவை சேனாதிராசா,வண்ணை ஆனந்தன் முதலான நூற்றுக்கு மேற்பட்ட இளைஞர்கள் ஆயுத நடவடிக்கைகளை தூண்டினார்கள் என்ற பெயரில் சிங்களச் சிறைகளில் நீண்ட பல காலங்களில் அடைக்கப்பட்டனர்.

1974 ஜனவரி 10 அன்று தமிழ் ஆராய்ச்சி மாநாட்டின் இறுதி நாள் நிகழ்வு வீரசிங்கம் மண்டபத்துக்கு வெளியே போட்டிருந்த பிரமாண்ட பந்தலில் நடைபெற்றது. அதில் மாநாட்டுப் பேராளர்கள் உரையாற்றினார்கள். இந்த மாநாடு திட்டமிடப்பட்ட போது இத்தனை எழுச்சியாக அது நடைபெறும் என்று அமைப்பாளர்கள் எதிர்பார்த்திருக்கவில்லை. மாநாடு நடைபெறுவது தொடர்பாக இலங்கை அரசு மேற்கொண்ட எதிர் நடவடிக்கைகள் தமிழ் பேசும் மக்களிடையே கோபத்தை தோற்றுவித்திருந்தது. மாநாட்டை எதிர்ப்பதில் இலங்கை முற்போக்குச் சங்கம் சிறிமாவோ பண்டாரநாயக்கா அரசோடு சேர்ந்து கொண்டது. யாழ்ப்பாண மாநாகர சபையின் மேயாராக இருந்த அல்பிரட் துரையப்பா மாநாடு நடத்துவதற்கு இடம் ஒதுக்க மறுத்துவிட்டார்.

மாநாட்டில் திருச்சி பேராசிரியர் நயினார் முகம்மது பேசிக் கொண்டிருந்த போது பொலிசார்; அங்கு ஆயிரக் கணக்கில் அமர்ந்திருந்த மக்களைத் தாக்கிக் கலைக்க முற்பட்டார்கள். கூட்டம் குழம்பத் தொடங்கியது. மக்கள் நெருக்கியடித்தபடி நகரத் தொடங்கினர்.அப்போது துப்பாக்கி வேட்டுச் சத்தங்கள் கேட்டன. மக்கள் மிரண்டோடத் தொடங்கினர்;. பொலிசாரின் துப்பாக்கிச் சூட்டினால் அறுந்து விழுந்த மின்சாரக் கம்பியில் இருந்து மின்ஒழுக்கில் அகப்பட்டு 10பேர் அலறியபடி செத்து மடிந்தார்கள். அக் காலத்தில் மாவை சேனாதிராசா முதலான 42 பேர் ஆயுதப் போராட்டங்களைத் தூண்டினவர்கள் என்று கைது செய்யப்பட்டு சிறைகளில் அடைத்தது அரசு. தமிழாராய்ச்சி மாநாட்டின் படுகொலைகளைக் கண்டித்து நீர்கொழும்பு சிறையில் உண்ணாவிரதமிருந்தார்கள்.
அவ்வேளையில் மேடை அருகில் சிவகுமாரன் தொண்டர்களோடு ஒரு தொண்டனாக நின்றிருந்தான். நடந்த சம்பவங்களை அவனால் தெளிவாக பார்க்கமுடிந்தது. இந்தச் சம்பவம் தான் பழிக்குப்பழி வாங்கவேண்டும் என்ற உத்வேகத்தை அவனுக்குள் உருவாக்கியது. கலாச்சார அமைச்சர் சந்திரசிறிக்கு எதிராக குண்டு வைத்தான். அடுத்த நாள் விடிவதற்கு முன்பாகவே நல்லூர் பாராளுமன்ற உறுப்பினர் வீட்டிற்கு காவலாக நின்ற பொலிசார் மீது சிவகுமாரன் வெடிகுண்டை வீசினான். பொலிஸார் காயமடைந்தார்கள். சிவகுமாரன் தேடப்படுபவனாக மாறினான். அவனைக் கைது செய்ய காவல் துறையினர் நடவடிக்கை எடுத்த போதுதான் 1974 ஆனி 05ம் நாள் சிவகுமாரன் வி~ம் அருந்தி உயிர் மாய்த்தான்.

சிவகுமாரன் தொடக்கி வைத்த ஆயுதப்போர் தலைவர் பிரபாகரன் முதலான இயக்கத் தலைவர்களால் மூன்று சகாப்தங்கள் முனனெடுக்கப்பட்டு நீடித்தன. போர் முடிந்து விட்டாலும் போருக்கான காரணங்கள் தொடர்ந்து இருந்து கொண்டே இருக்கின்றன.
இனச்சிக்கலுக்கு தீர்வாக சமஸ்டிக் கட்டமைப்பில் பிரிக்கப்படாத, ஒன்றுபட்ட இலங்கையில் தமிழர்களது வரலாற்று வாழ்விடமான வடக்கு கிழக்கு மாகாணங்களுக்கு தன்னாட்சி அதிகாரத்துடன் கூடிய மாகாண அரசு அமைக்கப்பட வேண்டும் என தமிழ்த் தேசியக் கூட்டமைப்பு கோரிவருகிறது. இதற்காக ஒரு புதிய அரசியல் யாப்பை உருவாக்கும் பணி நடைபெற்று வருகின்றது.
கடந்த ஆண்டு வழிகாட்டு குழுவின் இடைக்கால அறிக்கை வெளிவந்த போது அதற்கு சிங்கள – பௌத்த பேரினவாதிகளிடம் இருந்து கடுமையான கண்டனங்கள் வெளிவந்தன. அதில் காணப்பட்ட யோசனைகள் இலங்கையில் ஒரு தமிழீழத்தை உருவாக்கி விடும் என முன்னாள் ஜனாதிபதி மகிந்த இராஜபக்ச கூறினார். நாடு பிளவு படுவதை விரும்பாத சகலரும் தன்னோடு கைகோர்க்குமாறு அவர் அறைகூவல் விடுகிறார். பௌத்த மத பீடங்கள் புதிய யாப்பு தேவையில்லை என்று வாதிட்டன.
இப்போது அரசியலமைப்பு நிபுணர்கள் இடைக்கால அறிக்கையையும் அதன் பின்னர் இடம்பெற்ற விவாதங்களையும் கவனத்தில் கொண்டு பேச்சு வார்த்தைகளில் ஈடுபடுவதற்கு வசதியாக மாதிரி வரைவொன்றைத் தருவதற்கு ஒரு மாத கால அவகாசம் வழிகாட்டுக்குழுவால் வழங்கப்பட்டிருக்கிறது.
எது எப்படி இருப்பினும் ஒரு புதிய யாப்பு மூன்றில் இரண்டு பெரும்பான்மை வாக்குகளால் நிறைவேற்றப்படுவதற்கு நல்லாட்சி அரசிடம் வாக்குப்பலம் இருக்கிறதா என்ற கேள்வி எழுந்துள்ளது. சிறிலங்கா சுதந்திரக் கட்சி மூன்றாகப் பிரிந்துள்ளது. ஜனாதிபதி சிறிசேனா தலைமையில் உள்ள சிறிலங்கா கட்சியில் உள்ள நாடாளுமன்ற உறுப்பினர்களின் எண்ணிக்கை 46இல் இருந்து 25 ஆகக் குறைந்துள்ளது. ஐக்கிய தேசிய முன்னணி(105),மக்கள் விடுதலை முன்னணி (5), தமிழ்த் தேசியக் கூட்டமைப்பு(15) என மொத்தம் 125 நாடாளுமன்ற உறுப்பினர்கள் புதிய யாப்புக்கு ஆதரவாக இருக்கிறார்கள். எனவே ஜனாதிபதி சிறிசேனாவின் தலைமையில் உள்ள சிறிலங்கா கட்சியினர் ஆதரித்து வாக்களித்தால் மட்டுமே மூன்றில் இரண்டு பெரும்பாண்மை கிடைக்க வாய்ப்புண்டு.
புரையோடிப் போய்விட்ட நாட்டின் இனச் சிக்கலுக்குத் தென்னிலங்கை கட்சிகள் தீர்வு கண்டால் மட்டுமே நாட்டில் அமைதியும் பொருளாதார வளர்ச்சியும் சாத்தியமாகும். அரசியல் உறுதித்தன்மை இல்லாத ஒரு நாடு பொருளாதாரத்தில் முன்னேற்றம் காண முடியாது இனப்பிரச்சினைக்குத் தீர்வு காணமுடியாது என்பது அரசியல் பால பாடம்.
தமிழர்களால் ஏற்றுக் கொள்ளக்கூடிய புதிய யாப்பு முயற்சி தோல்லி கண்டால் மீண்டும் இனப்போராட்டம் தமிழர்களிடையே மீண்டும் தோன்றுவதை யாரும் தடுக்கமுடியாமற் போகும்.
புதிய யாப்பு முயற்சி தோல்வி கண்டால் தமிழினப் பிரச்சனைகளுக்குத் தீர்வில்லையானால் மீண்டும் போராட்டங்கள் ஏற்படும், பொன்.சிவகுமார் போன்றோர் தமிழர்களிடையே மீண்டும் தோன்றுவார்கள்!

கருத்துக்களேதுமில்லை

உங்கள் கருத்தை சொல்லுங்கள்