மட்டக்களப்பில் வேன்-பேருந்து மோதிய விபத்தில் இருவர் பலி;ஐவர் படுகாயம்

வேன் ஒன்றும் பேருந்தும் நேருக்கு நேர் மோதிய விபத்தில் 3 மாத குழந்தை உட்பட இருவர் உயிரிழந்தனர். அத்துடன் 5 பேர் படுகாயங்களுக்கு இலக்காகியுள்ளனர். நேற்று மாலை வாழைச்சேனையின் புனாணை பிரதான வீதியில் இந்த விபத்து இடம்பெற்றுள்ளது.

புத்தளத்திலிருந்து காத்தான்குடி நோக்கிப் பயணித்த வேனும் கல்முனை நோக்கிச் சென்ற பேருந்துமே இவ்வாறு நேருக்கு நேர் மோதி விபத்துக்கு உள்ளாகின. இதில் வேனில் பயணித்த 3 மாத ஆண்குழந்தை ஒன்று உயிரிழந்தது. அத்துடன் எம். எச். மசூத் (வயது 80) என்பவரும் உயிரிழந்தார்.

வேனில் பயணித்தவர்களில் காயமடைந்த 18 மாத குழந்தை வாழைச்சேனை ஆதார வைத்தியசாலையில் சேர்க்கப்பட்டுள்ளது. அத்துடன் நால்வர் மேலதிக சிகிச்சைக்காக மட்டக்களப்பு போதனா மருத்துவமனைக்கு மாற்றப்பட்டுள்ளனர்.