800 மில்லியன் ரூபா இன்னும் விவசாயிகளின் கணக்கில் செலுத்தப்படவில்லை – விவசாய திணைக்களம்

ஆசிய அபிவிருத்தி வங்கியினால் வழங்கப்பட்டுள்ள 800 மில்லியன் ரூபாவை விவசாயிகளுக்கு பகிர்ந்தளிக்கும் வேலைத்திட்டத்தில் 8% கணக்குகளின் கணக்கு இலக்கங்கள் திருத்தப்படவில்லை என விவசாய ஆணையாளர் நாயகம் எச்.எம்.எல்.ஏ. அபேரத்ன தெரிவித்துள்ளார்.

மேலும், சில விவசாயிகள் வட்டாரங்களுக்கு பொறுப்பாக உள்ள வேளாண்மை சேவை அலுவலர்கள் இதுவரை விவசாயிகளின் கணக்கு எண்களை அனுப்பவில்லை என தெரிய வந்துள்ளது.

விவசாய அபிவிருத்தி திணைக்களத்திற்கு அனுப்பப்பட்ட கணக்குகளில் 38 வீதமான கணக்குகள் பிழையானது என உறுதி செய்யப்பட்டுள்ளதாகவும், அவற்றை திருத்துவதற்கு விவசாய அமைச்சர் மஹிந்த அமரவீரவின் பணிப்புரையின் பேரில் திணைக்களத்தின் 20 பேர் கொண்ட பணியாளர்கள் ஈடுபடுத்தப்பட்டுள்ளதாகவும் அவர் வலியுறுத்தியுள்ளார்.

வேண்டுமென்றே தவறான விவசாய கணக்கு இலக்கங்களை வழங்கி தேவையான தகவல்களை வழங்காத பிராந்திய விவசாய சேவை உத்தியோகத்தர்களுக்கு எதிராக கடுமையான ஒழுக்காற்று நடவடிக்கை எடுக்க திணைக்களம் தீர்மானித்துள்ளதாகவும், இது ஒரு குழுவின் திட்டமிட்ட அதிகாரிகளின் நாசகார செயலாகவே தோன்றுவதாகவும் ஆணையாளர் நாயகம் சுட்டிக்காட்டியுள்ளார்.

“விவசாயிகளுக்கு நிவாரணம் வழங்கும் இந்த ஏற்பாட்டை சீர்குலைக்க இந்த அதிகாரிகள் செயற்பட்டதாகத் தோன்றுவதால், அவர்கள் மீது கடுமையான ஒழுங்கு நடவடிக்கை எடுக்கப்படும்” என்றும் ஆணையர் நாயகம் தெரிவித்துள்ளார்.

இந்த நெருக்கடியின் பின்னணியில் இரண்டு எதிர்க்கட்சிகளுக்கு ஆதரவான அதிகாரிகள் குழு இருப்பதாக தமக்கு தகவல் கிடைத்துள்ளதாக அமைச்சர் அமரவீர தெரிவித்துள்ளார்.

“அரச ஊழியர்கள் அரசியலில் ஈடுபட்டால், அவர்கள் பொதுப்பணியை விட்டுவிட்டு அரசியலில் சேரலாம்” எளவும் அவர் தெரிவித்துள்ளார்.

திணைக்களத்தின் நற்பெயருக்கு களங்கம் ஏற்படுத்தும் வகையில் செயற்படும் அதிகாரிகளுக்கு எதிராக கடுமையான ஒழுக்காற்று நடவடிக்கை எடுக்கப்பட வேண்டுமெனவும் அமைச்சர் ஆணையாளர் நாயகத்திற்கு பணிப்புரை விடுத்துள்ளார்.