தமிழர்களின் பிரதிநிதிகள் தமிழ்க் கூட்டமைப்பினரே!! மாற்று அணியினரைத் தோற்கடிப்போம்; வடமராட்சி கிழக்கில் சுமந்திரன் சூளுரை 

 “வடக்கு, கிழக்குத் தமிழ் மக்களின் பிரதிநிதிகள் தமிழ்த் தேசியக் கூட்டமைப்பினரே. அதற்கான ஆணையை இம்முறையும் மேலும் வலுவுள்ளதாக வழங்குங்கள்.”

– இவ்வாறு தமிழ்த் தேசியக் கூட்டமைப்பின் பேச்சாளரும் யாழ்ப்பாணம் – கிளிநொச்சி தேர்தல் மாவட்ட வேட்பாளருமான எம்.ஏ.சுமந்திரன் தெரிவித்தார்.

வடமராட்சி கிழக்கில் வத்திராயன், உடுத்துறை, ஆழியவளை, முள்ளியான், வெற்றிலைக்கேணி, கட்டைக்காடு ஆகிய பகுதிகளில் தமிழ்த் தேசியக் கூட்டமைப்பின் யாழ்ப்பாணம் – கிளிநொச்சி தேர்தல் மாவட்ட வேட்பாளர்களான எம்.ஏ.சுமந்திரன், சி.சிறிதரன் ஆகியோர் மக்கள் சந்திப்புகளில் ஈடுபட்டனர். இதன்போது சுமந்திரன் உரையாற்றும்போதே மேற்கண்டவாறு கூறினார்.

அவர் மேலும் தெரிவித்ததாவது:-

“வடக்கு, கிழக்கில் வாழுகின்ற தமிழ் மக்களின் பிரதிநிதிகளான தமிழ்த் தேசியக் கூட்டமைப்பினர் ஓர் அணியாக நிற்கின்றார்கள் – ஒரே நிலைப்பாட்டிலேயே இருக்கின்றார்கள் – அவர்களுக்கு மக்கள் கொடுத்துள்ள ஆணை சிதறுபட்டுள்ளதாக இல்லை – அந்த ஆணை ஒரே கொள்கையின் கீழ் மிகவும் பலமானது – வலுவானது என்பதைப் பொதுத்தேர்தலில் மக்கள் காட்ட வேண்டும். இதனூடாக ஓர் ஆசனத்துகாக ஆசைப்படுகின்ற மாற்று அணிகளை மக்கள் தோற்கடிக்க வேண்டும்” – என்றார்.

இந்த மக்கள் சந்திப்புகளில் வடக்கு மாகாண சபையின் முன்னாள் உறுப்பினர் எஸ்.சுகிர்தன், பருத்தித்துறை பிரதேச சபையின் தவிசாளர் அ.சா.அரியகுமார், ஓய்வுபெற்ற கோட்டக் கல்வி (மருதங்கேணி) அதிகாரி எஸ்.திரவியராசா மற்றும் பருத்தித்துறை பிரதேச சபையின் உறுப்பினர்கள் ஆகியோரும் கலந்துகொண்டனர்.